როგორ გავუმკლავდეთ სტრესს საერთაშორისო უნივერსიტეტებისთვის მომზადების დროს?

საერთაშორისო უნივერსიტეტებისთვის მომზადება შესაძლოა, შფოთვისა და გაურკვევლობის წყაროდ იქცეს. უამრავი გამოცდა, განაცხადი, ინტერვიუები და სასურველი უნივერსიტეტების შერჩევა – ყველაფერი ეს უამრავ ენერგიასა და დროს მოითხოვს. საბედნიეროდ, არსებობს რამდენიმე სტრატეგია, რომლებიც საერთაშორისო უნივერსიტეტებისთვის მომზადების პროცესში დაგეხმარებათ ემოციების მართვასა და საბოლოოდ, წარმატების მიღწევაში.

0. სტოიციზმი

სამყარო იყოფა ჩვენს კონტროლს და მის მიღმა არსებულ მოვლენებად. ხშირად, სტრესის წინაპირობა იმაზე ღელვაა, რისი კონტროლიც არ შეგვიძლია; ხოლო წარმატების მიღწევის გზა კი იმ მოვლენებზე კონცენტრირებაზე გადის, რომელთა შეცვლაც ჩვენს ხელთაა. თქვენ შეიძლება, ივარჯიშოთ მშვილდოსნობაში და რეალურად გახდეთ საუკეთესო მშვილდოსანი; თუმცა, ისრის მოზიდვისა და გასროლისას, ქარი ამოვარდეს და მიზანს ააცილოთ. საერთაშორისო უნივერსიტეტში ჩაბარება ამ პროცესს წააგავს - შესაბამისად, მაქსიმალური აქცენტი უნდა გააკეთო იმ 5 საკვანძო ფაქტორის მიმართულებით, რაც თქვენზეა, ხოლო დანარჩენზე ღელვა კი შეამციროთ. თუმცა, ისიც უნდა გვახსოვდეს, რომ ღელვა, ადამიანის ბუნებრივი მახასიათებელია და მისი სასარგებლოდ გამოყენებაც შეიძლება.

1. სტრესის უარყოფითი გავლენა: ფიზიკური და მენტალური ჯანმრთელობა

პირდაპირი კავშირი არსებობს შფოთვასა და ფიზიკურ რეაქციებს შორის. ხშირი დაღლილობა, დაძაბულობა, ძილის პრობლემები – სტრესი და ემოციური ჭირვეულობა გავლენას ახდენენ თქვენს ჯანმრთელობასა და ეფექტურობის დონეზე. მოიწესრიგეთ ძილის რეჟიმი; გათვლა გააკეთეთ 8 საათიან ძილზე; იკვებეთ ჯანსაღად; გაერთეთ და არ დაივიწყოთ ურთიერთობები მეგობრებსა და ოჯახის წევრებთან. ამ გზით თქვენ დაიცავთ საკუთარ ფიზიკურ და მენტალურ ჯანმრთელობას.

2. სტრესი და მოტივაცია: როგორ შევქმნათ მათ შორის ჰარმონია

სტრესი და მოტივაცია ხშირად ერთმანეთში ირევა, განსაკუთრებით, როდესაც დიდ მიზნებს ვესწრაფვით. სტრესი არ არის მხოლოდ ნეგატიური გრძნობა; ის ჩვენი ენერგიის ნაწილია, რომელიც შეიძლება ეფექტურად ვმართოთ. როდესაც წინ გვაქვს მნიშვნელოვანი ამოცანა, სტრესი შეიძლება დაგვეხმაროს კონცენტრაციაში და უფრო პროდუქტიულად მუშაობაში.

სცენარი შეიძლება იყოს ისეთი: როდესაც ვიცით, რომ დრო შეზღუდულია და შედეგის მისაღწევად მეტი ძალისხმევა გვმართებს, სტრესი შესაძლოა გახდეს მამოძრავებელი ძალა. ამ დროს არ უნდა ვცადოთ სტრესის თავიდან აცილება, არამედ მისგან საუკეთესო შედეგის მიღების გზა უნდა ვიპოვოთ. სწორად გამოყენებული სტრესი ხელს შეგიწყობთ მიზნის მიღწევაში. ამ გზაზე, გირჩევთ, დაიხმაროთ მედიტაციები და სუნთქვით ვარჯიშები.

3. საკუთარ თავზე ზრუნვა: შფოთვის შემცირება თვითგანვითარებით

როდესაც სტრესის მართვა გიჭირთ, ხშირად რჩება დრო მხოლოდ საქმეზე. თუმცა, არა მარტო ფიზიკური, არამედ ფსიქიკური განტვირთვა აუცილებელია. რეგულარულად განახორციელეთ საქმიანობები, რომლებიც თქვენს გონებას განვტვირთვაში დაეხმარებიან; მაგალითად, აწარმოეთ დღიური, მედიტაცია; არაჩვეულებრივი იდეაა ყოველდღე გამოყოთ დრო სეირნობისთვის. ამ გზებით თქვენ აღიდგენთ ენერგიას და შეძლებთ უფრო პროდუქტიულად გააგრძელოთ მომზადება ახალი ძალებით.

4. დროის მართვა: გრაფიკის სწორად შედგენა

გადატვირთული გრაფიკი, გრძელი სამუშაო საათები და ყოველდღიური დავალებების ჩამონათვალი კიდევ უფრო ართულებს პროცესს. თუმცა, ეფექტური დროის მართვა მნიშვნელოვნად ამცირებს სტრესს. გირჩევთ, შეადგინოთ დღიური ან კვირეული გრაფიკი და განსაზღვროთ თუ რა გჭირდებათ ყურადღების მაქსიმალურად გამახვილებისთვის. შეინარჩუნეთ ბალანსი სწავლასა და დასვენებას შორის, რადგან ზედმეტი დატვირთვა შესაძლოა კონტრპროდუქტიული აღმოჩნდეს.

5. ემოციების მართვა: დავიხმაროთ მეგობრები და ოჯახის წევრები

ზოგჯერ თავში უამრავი კითხვა გიტრიალებთ და ეს შფოთს იწვევს. ამისაგან თავის დაღწევის ერთ-ერთი გზა ისაა, რომ ჩვენს გამოწვევებზე ვისაუბროთ მეგობრებთან და ოჯახის წევრებთან. გარდა განტვირთვისა და თერაპიული ეფექტისა, სხვებთან საუბარი თქვენი პრობლემების გადააზრებაში დაგეხმარებათ და შესაძლოა, სრულებით, საკითხების უფრო ეფექტური გადაწყვეტები გაპოვნინოთ.

6. დადებითი აზროვნება: სტრესის წინააღმდეგ

როდესაც რაღაც არ გამოგვდის, შესაძლოა, ჩვენს თავს ნეგატიურად მივმართავდეთ ან მკაცრად ვუდგებოდეთ და მისგან ზედმეტს ვითხოვდეთ. არსებობს მოტივაციის დადებითი წყაროებიც. თუ რაღაც არ გამოდის დაღლის თუ სხვა ფაქტორების გამო, მივცეთ ჩვენს თავს დასვენების უფლება და ამავე დროს გვახსოვდეს, რომ ყველაზე ძლიერი ადამიანი ის არის, ვინც ცხრაჯერ დაეცემა და მეათედ მაინც წამოდგება.

დასკვნა: სტრესი მხოლოდ დროებითი გამოწვევაა

სტრესი არ არის მუდმივი. მიუხედავად იმისა, რომ საერთაშორისო უნივერსიტეტებისთვის მომზადება რთულია, ყოველი მცირე დაბრკოლების გადალახვა წარმატებასთან ეტაპობრივად გვაახლოებს. გახსოვდეთ, რომ ეს სტრესი დროებითია, მაგრამ აუცილებელი პირობაა რათა თქვენი ოცნების უნივერსიტეტში სრული დაფინანსებით ჩააბაროთ. შესაბამისად, გრძელვადიანი ბედნიერებისთვის, მზად უნდა იყოთ, მოკლევადიან პერიოდში დაუპირისპირდეთ გამოწვევებს და გადაჭრათ ისინი.

გაგვიზიარეთ თქვენი მიზნები და ერთად ვიპოვით გზას თქვენი საერთაშორისო წარმატებისკენ! კონსულტაციაზე ჩასაწერად იხილეთ University Counseling